Woordeboek van Afrikaans Vandag

parafilie s.nw. | parafilieë | (psigiatrie en psigoanalise) patroon van herhalende seksueel prikkelende gedagtes of gedrag wat ongewone en veral sosiaal onaanvaarbare seksuele praktyke behels: › Parafilie (voorheen bekend as seksuele perversie en seksuele afwyking) is intense seksuele prikkeling wat meegebring word deur atipiese voorwerpe, situasies, fantasieë, gedrag of individue (Wikipedia, 28 April 2023). › Die reeks gedigte [van Franco Colin] wat spesifiek handel oor seksuele afwykings of parafilieë beskik elkeen oor die ironiese titel “Naas(te) liefde” gevolg deur ’n saaklike benoeming van die bepaalde patologie soos “Naas(te)liefde: Roomse pedofiel” en “Naas(te)liefde: Loervink”. Telkens verwoord die spreker hoe ’n spesifieke versteuring in konkrete en lyflike terme beleef word, hoewel die verwoording hiervan telkens deur die wrang-ironiese lens van die psigiater-digter geskied (Neil Cochrane, Netwerk24, 25 Julie 2022). › Die Amerikaanse Diagnostic and Statistical Manual of Mental Disorders (DSM-5) gebruik die woord parafilie om atipiese seksuele gedrag te beskryf en parafiliese versteuring vir die beskrywing van ’n disfunksie soos hier onder gedefinieer: 1) Dit duur reeds minstens ’n tydperk van ses maande. 2) Dit behels ’n herhaalde, intense seksuele opwekking deur ’n nielewende objek of spesifieke liggaamsdeel wat gemanifesteer word in fantasieë, drange en gedrag. 3) Dit veroorsaak merkbare ongemak en spanning by die persoon en het ’n negatiewe impak op sosiale, beroeps-, verhoudings- of enige ander vlak van die persoon se lewe (Elmari Mulder Craig, Netwerk24, 1 Augustus 2015).
◌ ENGELS: paraphilia